ශ්රී ලංකා ක්රිකට් ආයතනය සංවිධානය කරන ගවර්නර්ස් කප් අන්තර් සමාජ එක්දින ක්රිකට් තරගාවලියේ අද (06) බෝයගනේදී පැවැති හෙට්ටිපොළ ක්රීඩා සමාජය සහ ඔල්ඩ් ධර්මපාලියන්ස් කණ්ඩායම අතර තරගයෙන් කඩුලු 6ක පහසු ජයක් ඔල්ඩ් ධර්මපාලියන්ස් කණ්ඩායමට හිමිවිය. එම ජයග්රහණය ලැබෙන විට ඔවුන්ට තවත් පන්දුවාර 18.2ක් ඉතිරිව තිබුණි.
මෙම ජයග්රහණයේ ප්රධාන වීරයා වූයේ විරංග යෙෂාන්ය. ඔහු පන්දු 50කදී හතරේ පහර 8ක් සහ හයේ පහර 2ක් සමගින් ලකුණු 66ක් රැස් කළ අතර, පන්දු යැවීමේදී ලකුණු 24කට කඩුලු 3ක් ද දවාලීය. එම දක්ෂතා හේතුවෙන් තරගයේ දක්ෂතම ක්රීඩකයා ලෙස ද ඔහු නම් කෙරිණි.
මුලින් පන්දුවට පහර දුන් හෙට්ටිපොළ ක්රීඩා සමාජය පන්දුවාර 50 අවසානයේ සියලු දෙනා දැවී ලකුණු 210ක් රැස් කළේය. ඊට පිළිතුරු ලෙස ඔල්ඩ් ධර්මපාලියන්ස් කණ්ඩායම පන්දුවාර 31.2කදී කඩුලු 4ක් පමණක් දැවී ලකුණු 213ක් ලබා ජය තහවුරු කළේය.
මෙම ඉනිමේ කැපී පෙනෙන සබඳතාවය වූයේ අංක 5 පිතිකරු විරංග යෙෂාන් සහ අංක 4 පිතිකරු මොහොමඩ් ශිල්මි (නොදැවී 63) අතර පස්වන කඩුල්ලට ගොඩනැගුණු නොබිඳුණු ලකුණු 119ක සබඳතාවයයි.
කෞෂික කුමාරසිංහගේ තුන් ඉරියව් දක්ෂතා මහනුවරට දැවැන්ත ජයක්
අනුරාධපුර සමාධි ක්රීඩාංගණයේ පැවැති මහනුවර ක්රිකට් සමාජය සහ කඳුකර ක්රිකට් සමාජය අතර තරගයෙන් ලකුණු 171ක විශිෂ්ට ජයක් මහනුවර ක්රිකට් සමාජයට හිමිවිය.
මහනුවර කණ්ඩායම වෙනුවෙන් කෞෂික කුමාරසිංහ ලකුණු 20ක් රැස් කළ අතර, පසුව පන්දු යැවීමේදී ප්රතිවාදී ඉදිරිපෙළ පිතිකරුවන් තිදෙනෙකු ඇතුළුව ලකුණු 17කට කඩුලු 3ක් දවාලමින් විශිෂ්ට තුන් ඉරියව් දක්ෂතා දැක්වීය. ඒ අනුව ඔහු තරගයේ දක්ෂතම ක්රීඩකයා ලෙස නම් කෙරිණි.
මුලින් පන්දුවට පහර දුන් මහනුවර ක්රිකට් සමාජය පන්දුවාර 49.5කදී ලකුණු 335ක් රැස් කළේ තිසරු දිසානායකගේ ලකුණු 80, යෝෂිත සෙනුරංගගේ ලකුණු 57 සහ පුලීෂ තිලකරත්නගේ ලකුණු 52ක අර්ධ ශතක මතය.
පිළිතුරු ඉනිම ක්රීඩා කළ කඳුකර ක්රිකට් සමාජය කෞෂික කුමාරසිංහගේ දක්ෂ පන්දු යැවීම හමුවේ පන්දුවාර 35කදී සියලු දෙනා දැවී ලකුණු 164කට සීමා විය.
සිනෙත් දිසානායකගේ පන්දු යැවීමෙන් ලන්කන් ක්රිකට් සමාජයට ජය
ගාල්ල ජාත්යන්තර ක්රිකට් ක්රීඩාංගණයේ පැවැති අම්බලන්ගොඩ සිංහ ක්රීඩා සමාජය සහ ලන්කන් ක්රිකට් සමාජය අතර තරගයෙන් කඩුලු 6ක ජයක් ලන්කන් ක්රිකට් සමාජයට හිමිවිය.
ලන්කන් කණ්ඩායමේ සිනෙත් දිසානායක ලකුණු 29කට කඩුලු 4ක් දවාලමින් දක්ෂ පන්දු යැවීමක නිරත වූ අතර, ඔහු තරගයේ දක්ෂතම ක්රීඩකයා ලෙස නම් කෙරිණි.
මුලින් පන්දුවට පහර දුන් අම්බලන්ගොඩ සිංහ ක්රීඩා සමාජය පන්දුවාර 46.4කදී සියලු දෙනා දැවී ලකුණු 220ක් රැස් කළේය.
පිළිතුරු ඉනිම ක්රීඩා කළ ලන්කන් ක්රිකට් සමාජය පන්දුවාර 42කදී කඩුලු 4ක් පමණක් දැවී ලකුණු 221ක් ලබා පහසු ජයක් වාර්තා කළේය.
එම ජයග්රහණයේදී පැතුම් මෙන්ඩිස් පන්දු 90කදී හතරේ පහර 2ක් සහ හයේ පහර 3ක් සමග නොදැවී ලකුණු 74ක් රැස් කළේය. ඔහු සහ ගැවින් බොතේජු අතර පස්වන කඩුල්ලට ගොඩනැගුණු නොබිඳුණු ලකුණු 91ක සබඳතාවය ද තරගයේ කැපී පෙනුණි.
යොහාන් කල්හාරගේ පන්දු යැවීමෙන් නාරම්මලට ජය
කුරුණෑගල වෙලගෙදර ක්රීඩාංගණයේ පැවැති නාරම්මල ක්රීඩා සමාජය සහ යුනිචෙලා ක්රීඩා සමාජය අතර තරගයෙන් කඩුලු 6ක ජයක් නාරම්මල ක්රීඩා සමාජයට හිමිවිය.
නාරම්මල කණ්ඩායමේ යොහාන් කල්හාර ලකුණු 33කට කඩුලු 4ක් දවාලමින් දක්ෂ පන්දු යැවීමක නිරත වූ අතර, ඔහු තරගයේ දක්ෂතම ක්රීඩකයා ලෙස ද නම් කෙරිණි.
යුනිචෙලා ක්රීඩා සමාජය මුලින් පන්දුවට පහර දී ලකුණු 149කට සීමා වූ අතර, පිළිතුරු ඉනිම ක්රීඩා කළ නාරම්මල ක්රීඩා සමාජය පන්දුවාර 35.4කදී කඩුලු 4ක් පමණක් දැවී ලකුණු 155ක් ලබා ජය වාර්තා කළේ තවත් පන්දුවාර 15.1ක් ඉතිරිව තිබියදීය.
ලකුණු විස්තරය
- හෙට්ටිපොළ ක්රීඩා සමාජය – ඕල්ඩ් ධර්මපාලියන්ස් ක්රීඩා සමාජය – කුරුණෑගල බෝයගනේ දී
ඕල්ඩ් ධර්මපාලියන්ස් ක්රීඩා සමාජයට කඩුලු 6ක ජයක්
හෙට්ටිපොළ ක්රීඩා සමාජය පන්දුවාර 50ක දී සියල්ල දැවී ලකුණු 210 – අර්ෂාන් ජෝශප් 43, ශෙනාල් පෙරේරා 39, ඔමේෂ් විද්යාරත්න 36, විරංග යෙෂාන් 24/3, රුචිර සිල්වා 22/2, ගීත් සංකල්ප 24/2, ශානක සම්පත් 30/2
ඕල්ඩ් ධර්මපාලියන්ස් ක්රීඩා සමාජය පන්දුවාර 31.2ක දී කඩුලු 4ක් දැවී ලකුණු 213 – විරංග යෙෂාන් 66, මොහෙමඩ් ශීල්මි නොදැවී 63, තරිඳු මධුවන්ත නොදැවී 57, ඔමේෂ් විද්යාරත්න 41/2
(තරගයේ දක්ෂතම ක්රීඩකයා – විරංග යෙෂාන් – ඕල්ඩ් ධර්මපාලියන්ස් ක්රීඩා සමාජය)
- යුනිචෙලා ක්රීඩා සමාජය – නාරම්මල ක්රීඩා සමාජය – කුරුණෑගල වෙලගෙදර ක්රීඩාංගණයේ දී
නාරම්මල ක්රීඩා සමාජය කඩුලු 6කින් ජය ගනී
යුනිචෙලා ක්රීඩා සමාජය පන්දුවාර 42ක දී සියල්ල දැවී ලකුණු149 – තරුන් පෙරේරා 44, සනිතු අමරසිංහ 35, සනුක චෙරාන් 16, යොහාන් කල්හාර 33/4, අයේෂ් රෂ්මික 15/3, ප්රියශාන් සිල්වා 29/3
නාරම්මල ක්රීඩා සමාජය පන්දුවාර 34.5ක දී කඩුලු 4ක් දැවී ලකුණු 155 – ඉන්දික ප්රසන්න 54, දිමත් අබේසිංහ නොදැවී 44, ලුදීෂ මාතරගේ නොදැවී 36, විනුද් මධුශාන් 26/2, සයුරු උඩුකුඹුර 34/1, ධනුෂ්ක උදාර 35/1
(තරගයේ දක්ෂතම ක්රීඩකයා – යොහාන් කල්හාර – නාරම්මල ක්රීඩා සමාජය)
- අම්බලන්ගොඩ සිංහ ක්රීඩා සමාජය – ලන්කන් ක්රිකට් සමාජය – ගාල්ල ජාත්යන්තර ක්රිකට් ක්රීඩාංගණයේ දී
ලන්කන් ක්රිකට් සමාජයට කඩුලු 4ක ජයක්
අම්බලන්ගොඩ සිංහ ක්රීඩා සමාජය පන්දුවාර 46.4ක දී සියල්ල දැවී ලකුණු 220 – ඇසදිස ද සිල්වා 43, ධනුෂ්ක ගුරුසිංහ 40, චාමික සඳරුවන් 34, නික්ෂා ඉද්දමල්ගොඩ 31, කවීෂ කුමාර 24, සමිඳු මධුරංග 22, සෙනෙත් දිසානායක 29/4, ඉසුරු කවීෂ 55/3
ලන්කන් ක්රිකට් සමාජය පන්දුවාර 42ක දී කඩුලු 4ක් දැවී ලකුණු 221 – පැතුම් මෙන්ඩිස් නොදැවී 74, තෙනුක ප්රවීන් 44, කළණ මධුශංක 34, ගැවින් බොතේජු නොදැවී 25, තෙවින් අමරසිංහ 21, ධනුෂ්ක ගුරුසිංහ 10/1
(තරගයේ දක්ෂතම ක්රීඩකයා – සෙනෙත් දිසානායක – ලන්කන් ක්රිකට් සමාජය)
- මහනුවර ක්රිකට් සමාජය – කඳුකර ක්රිකට් සමාජය – අනුරාධපුර සමාධි ක්රීඩාංගණයේ දී
මහනුවර ක්රිකට් සමාජය ලකුණු 171කින් ජය ගනී
මහනුවර ක්රිකට් සමාජය පන්දුවාර 49.5ක දී සියල්ල දැවී ලකුණු 335 – තිසරු දිල්ෂාන් 80, දිනාල් ප්රනාන්දු 57, යෝෂිත ඉසුරංග 57, පුලීෂ තිලකරත්න 52, කෞෂික කුමාරසිංහ 27, මෙදුනක විජේතිලක 23, ලක්ෂාන් පෙරේරා 56/4, සුදේශ් ඉඳුනිල් 66/2, නිශාන් සමරක්කොඩි 68/2
කඳුකර ක්රිකට් සමාජය පන්දුවාර 35ක දී සියල්ල දැවී ලකුණු 164 – ජයරංග රාමනායක 38, දිනේෂ් මධුශාන් 29, නුවන් මෙන්ඩිස් 23, කවික මධුශංක 20, කෞෂික කුමාරසිංහ 17/3, මෙදුනක විජේතිලක 26/3, සෙත්මික සෙනෙවිරත්න 47/2
(තරගයේ දක්ෂතම ක්රීඩකයා – කෞෂික කුමාරසිංහ – මහනුවර ක්රිකට් සමාජය)
